Tubiret, Axxam n yidles Ali Zamoum yerra tajmilt i Salah Boukrif

I lmend n usmekti wis 38 n tefsut n Yimaziɣen, axxam n yidles Ali Zamoum n Tubiret ihegga-d imalas adelsan. Irmad n tmesbanit-a ad ilin si 15 ɣer 21 seg waggur n yebrir 2018 w’ad tili  d tajmilt i umeɣnas Salah Boukrif (ad t-yerḥem Rebbi).

Ad nesmekti belli Salah Boukrif yella d ameɣnas si zik. Yella seg yimezwura yennuɣen ɣef tmaziɣt d tugdut. Ittekka di tnekra n tefsut n 80, yerna yella gar 24 imeɣnasen i yewwin ɣer lḥebs n Berwagiya. Di 1981, yerna isɛedda 18 n wagguren di lḥebs n lḥarrac. Salah boukrif d ameɣnas asertan deg ukabar n FFS di 1989, syen akkin yuɣal-d ɣer RCD di 1996. Dɣa s yisem n ukabar-a (RCD) i yεedda di tefranin n twilayin n 1997, d amefran (Elu) deg usqamu aɣerfan awilay (APW) n lezzayer tamanaɣt. Yemmut deg 25 si yebrir 2005 seld mi d-yuɣal kan si tikili n tefsut n Yimaziɣen i deg ittekka i d-yellan di temdint n tubiret.

Ahil i d-ihegga waxxam n yidles Ali Zamoum n tubiret i wesfugel n tefsut n Yimaziɣen d wass n tusna d abaɣur.  Ad ilint deg-s aṭas n temziknin ; tid ɣef yedlisen, allalen imensayen s umata, isufar n wucci, tismilin n tmucuha d wunuɣen, ɣef ugemmay n tfinaɣ. Ma d amezgun, d yiwet n tarbaεt si Tizi Wezzu ara d iqedmen tacequft «ameḥkuk n tegzi» (la poudre d’untelligence) n Kateb Yacine. Ali Mouzaoui, netta, ass n 15 yebrir, yemeslay-d  ɣef ayen icudden gar «sinima d tmaziɣt.»  Deg n wass-nni kan, Nadia Berdous, tasdawent  n ugezdu n tmaziɣt n tubiret, nettat, tewwi-d awal ɣef «tefrit n tmagit d uqader n yiman-ik.»

Ma d ayen yaεnan isaragen, ad ilin s waṭas, gar-asen ɣef Salah Boukrif, aselmed n tmaziɣt s umata …

Ass n 20 yebrir, ad ruḥen yemdanen ɣer tenṭelt n Salah Boukrif, deg tɣiwant n Yimceddalen,  ad sersen din tameqqunt n yijeǧǧigen w’ad setreḥmen ɣef yiman-is.

                                                                                      Slimane Chabane

vous pourriez aussi aimer Plus d'articles de l'auteur

%d blogueurs aiment cette page :